في صوت عم اسمعو - طرف الشباك مفتوح - عم يفوت منو شوية هوى .. حطيتي الشريط بمكانو سكرتي باب المسجلة .. تشك
بلشت الموسيقا ..
الله .. انا فتحت سبيكر .. دفنت راسي بين ايديي وصرت اسمع ..
" مين دا .. مين دا اللي ياخدني منك .. ولا ولا يبعدني عنك "
ومين غيرها .. وردة .. الصوت المخملي اللي منحبو او ان صح التعبير اللي خليتك تحبيه بعد كتر حكيي عليه .. بعد كل الاغاني اللي الها وسمعتك ياها
الخمسة اشرطة اللي جنب المسجلة
" في يوم وليلة ، العيون السود ، قلبي سعيد وياك ، قال ايه .. وطبعا اغنية عايزة معجزة "
اللي عم نسمعها هلا .. يمكن هيي كمان عم تسمعنا ..
بتذكر شو حكيتك هداك النهار .. وقت تكوني مدايقة شغلي هالاغنية .. بحسها مثال للحب القوي الصادق .. اللي مامنو مفر .. متل القدر
" انا وانتا حكاية حلوة .. للقسمة والنصيب "
وردة لساها عم تغني .. صوت انفاسك عم حس فيه مضطرب .. خايفة
" انا عايزة معجزة تنجدني من الحنين .. انا عايزة معجزة .. اكبر من السنين واقوى مني ومنك والعالم اجمعين "
هك عم تغني وتقول وردة .. لـ لحظة بيخطرلي
ياريت كون المعجزة .. اللي بتنجدك
حبك لفوق السما بتلت امتار
تكوني غيمتين على شكل قلب
تكوني كلمات ملحم بركات
" تقلي بحبك قلك عيد .. عيد يا حبيبي عيد وتقلي بحبك"
تكرار الحب .. تكرار اللهفة .. مع الثبات والصدق
خلصت الاغنية ..
طفيتي المسجلة .. ضو الغرفة .. سامع صوت مشيتك .. رايحة على النوم
بكتبلك رسالة
" الى ذاتي .. الى ياء ملكيتي وانانيتي .. الى روحي المروضة .. النقية .. الجميلة .. عشرون قبلة
وقبلة اخرى لخوفك .. لضعفك .. لصمتك ..
احبكِ و احب الله والقمر واحب عيناك المغمضة
وتلك الربطة البنفسجية على شعرك
ثم احب نفسي .. حين اسعدك"
بتبتسمي وقت تقرأي الرسالة .. انا ماشفتك
بس حسيت .. وانتي هك ديما بتراهني على احساسي .. بتسكري الخط وبتنامي
- يمكن وردة كان قصدها هي اللحظات وقت غنت
" في يوم وليلة خدنا حلاوة الحب "
إرسال تعليق