أم كلثوم و فيروز بغنوا للحب .. بس #الحب_أنواع

أم كلثوم ولا فيروز ؟

الفرق بين #أم_كلثوم وفيروز متل بالضبط الفرق بين بنت جامعية بالعشرين بربيع عمرها و بين زوجة ما إلها دقايق منيمة أطفالها وبتلم أشلاء البيت بالليل قبل ما تروح تنام .. #فيروز بتغني للبدايات ..  للحبيب اللي ما في عيوب ولو في عيوب فهي مش شايفيتها ولا بدها تشوفها .. بتغني للحب #غير_المنطقي يللي بخلي صبية قاعدة عشر ليالي ع السطح سهرانة منشان تجيب لحبيبها القمر .. الحب الأسطوري اللي بتتخيله البنات قبل ما الحياة تعطيها الخبرة .. حتى صوت فيروز المرهف وجسمها #النحيل لابقين ع رقة يللي بتقوله كله كلام رقيق و تشبيهات ناعمة بتشبه فيها الحبيب الحلو المغرور .. حتى أحلامها وطموحاتها في الحب هاد بريئة وشفافة .. وقفة فيروز كمان ع المسرح وراسها شامخ ومناخيرها مرفوعة للسما كل هاد بشبه اعتداد الصغيرات بأنفسهن .. لسا ما اختبروا #الحياة منيح ولسا ما شافوا شي من الدنيا غير يللي بخليها مقتنعة إنها عصفورة الساحات ..

على الجانب الآخر أم كلثوم في أغانيها هي الست يللي " قطار الدنيا داس عليها رايح جاي .. " بتغني للحب الصعب يللي مليان تجارب مريرة عارفة عيوب حبيبها وبتغنيلها وبتعترف فيها و عزة نفسها مانعاها .. يللي عاشت تجارب مرة مبينة ف #صوتها_الساخر لما بتقله ولا فاكر كلمة حتعيد اللي كان ..

أم كلثوم بشكلها المتعارف عليه ف تسجيلات حفلاتها يللي وصلتنا هي امرأة #مش_جميلة لا شكل ولا ك جسم واقفة راسخة بتقلها ع المسرح وفي الحياة بتغني للعشرة والسنين الطويلة وافتكرت فرحت وياك قد إيه .. بتغني للعمر اللي بينهم اللي عاشته
بتحب وبتتألم بس بتعترف صالحت بيك أيامي سامحت بيك الزمن .. أم كلثوم شبه #ست_متجوزة و عندها ولاد و عارفة قديش الزواج مرهق عمرها بالأربعينات فاهمة الدنيا صح وحتى حرقتها و هي ماسكة المنديل وبتغني من قلب قلبها بتشبه بالضبط شكل ست أربعينية و هي بتتخانق مع زوجها يللي بتحبه ..

فيروز بتسمعها و المزاج #رايق
ام كلثوم بتسمعها منشان #تروق مزاجك
فيروز ضعيفة في حبها من انصار انه ما في كرامة بالحب
ام كلثوم قوية و متماسكة و من انصار انه الحب هو الكرامة

أم كلثوم و فيروز بغنوا للحب .. بس #الحب_أنواع